Цари́це моя́ Преблага́я, Наде́ждо моя́, Богоро́дице, Прия́телище си́рых и стра́нных Предста́тельнице, скорбя́щих Ра́досте, оби́димых Покрови́тельнице!

Зри́ши мою́ беду́, зри́ши мою́ скорбь; помози́ ми, я́ко не́мощну, окорми́ мя, я́ко стра́нна! Оби́ду мою́ ве́си, разреши́ ту, я́ко во́лиши: яко не и́мам ины́я по́мощи, ра́зве Тебе́, ни ины́я Предста́тельницы, ни благи́я Уте́шительницы, то́кмо Тебе́, о Богома́ти! Я́ко да сохрани́ши мя и покры́еши во ве́ки веко́в. Ами́нь.

Перевод:

Царица моя Преблагая, Надежда моя, Богородица, Приют сирот и странников Защитница, скорбящих Радость, обиженных Покровительница! Видишь мою беду, видишь мою скорбь; помоги мне, как немощному, направь меня, как странника. Обиду мою знаешь: разреши ее по Своей воле. Ибо не имею я иной помощи, кроме Тебя, ни иной Защитницы, ни благой Утешительницы – только Тебя, о Богоматерь: да сохранишь меня и защитишь во веки веков. Аминь.

Не и́мамы ины́я по́мощи, / не и́мамы ины́я наде́жды, / ра́зве Тебе́, Влады́чице. / Ты нам помози́, / на Тебе́ наде́емся, и Тобо́ю хва́лимся. / Твои́ бо есмы́ раби́, да не постыди́мся.

Перевод:

Не имеем иной помощи, / не имеем иной надежды, / кроме Тебя, Владычица. / Ты нам помоги: / на Тебя надеемся / и Тобою хвалимся, / ибо мы – Твои рабы; / да не постыдимся!

Вели́чит душа́ Моя́ Го́спода, и возра́довася дух Мой о Бо́зе Спа́се Мое́м. 

Честне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем. 

Я́ко призре́ на смире́ние рабы́ Своея́, се бо от ны́не ублажа́т Мя вси ро́ди. 

Честне́йшую херуви́м…

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́. 

Честне́йшую херуви́м…

Сотвори́ держа́ву мы́шцею Свое́ю, расточи́ го́рдыя мы́слию се́рдца их. 

Честне́йшую херуви́м…

Низложи́ си́льныя со престо́л, и вознесе́ смире́нныя; а́лчущия испо́лни благ, и богатя́щияся отпусти́ тщи. 

Честне́йшую херуви́м…

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка. 

Честне́йшую херуви́м…

Тя́, Ма́терь Бо́жию, хва́лим, Тя́, Мари́ю Присноде́ву и Богоро́дицу, испове́дуем, Тя́, от Преве́чнаго Отца́ избра́нную, вся́ земля́ велича́ет; Тебе́ вси́ А́нгели и Арха́нгели, Тебе́ вси́ Нача́ла смире́нно слу́жат; Тебе́ вси́ Вла́сти и превы́шния Си́лы небе́сныя, и вся́ Госпо́дствия повину́ются; Тебе́ вси́ Престо́ли, Тебе́ Херуви́ми и Серафи́ми ра́дующеся предстоя́т, Тебе́ вси́ а́нгельския ли́ки непреста́нным гла́сом вопию́т: Пресвята́я Богоро́дице Мари́е, Ма́ти Присноде́во! по́лны су́ть небеса́ и земля́ вели́чества сла́вы чре́ва Твоего́; Тебе́ пресла́вный апо́стольский ли́к своего́ Творца́ и Спаси́теля Ма́терь восхваля́ют; Тебе́ му́чеников мно́жество Богоро́дицу велича́ют; Тебе́ пресла́вный испове́дников ли́к Святы́я Тро́ицы хра́м нарица́ют; Тебе́ де́вственнии полцы́ своего́ де́вства о́браз пропове́дуют; Тебе́ вси́ святы́х ду́ши пресла́вную Цари́цу Небе́с нарица́ют; Тебе́ по все́й вселе́нней свята́я Це́рковь все́х ве́рных христиа́н испове́дует Ма́терь Бо́жию и почита́ет и́стиннаго Царя́ Небе́снаго Богоизбра́нную Отрокови́цу; Ты́ А́нгелов Госпоже́ и все́х святы́х сла́ва; Ты́ ра́йская отве́рстая две́рь; Ты́ ле́ствице Ца́рствия Небе́снаго; Ты́ Царя́ сла́вы прекра́сный черто́же; Ты́ неистле́нный ковче́же благода́ти; Ты́ бе́здна щедро́т; Ты́ прибе́жище гре́шных; Ты́, благослове́нная Ма́ти Спаси́теля Христа́; Ты́, ра́ди освобожде́ния плене́ннаго челове́ка, Бо́га восприя́ла еси́ во чре́во от Ду́ха Свята́го и Невмести́маго вмести́ла еси́; Тобо́ю попра́н бы́сть а́дский вра́г и отверзо́шася ве́рным две́ри Ца́рствия Небе́снаго; Ты́ одесну́ю Бо́га стои́ши; Ты́ Его́ умоля́еши за на́с, Присноде́во Мари́е, И́же бу́дет суди́ти живы́х и ме́ртвых; Тя́ у́бо жела́ем всегда́ бы́ти на́шу Засту́пницу к возлю́бленному Сы́ну Твоему́ и Бо́гу, И́же честно́ю кро́вию на́с искупи́л е́сть, да восприи́мем ве́чныя сла́вы обетова́ние. Спаси́ лю́ди Твоя́, о, Влады́чице, и благослови́ достоя́ние Твое́, я́ко да бу́дем прича́стницы блаже́ннаго насле́дия Сы́на Твоего́, и упаси́ на́с, и возьми́ на́с да́же до ве́ка, на вся́к де́нь. О, Преще́драя! хвали́ти и блажи́ти Тя́ жела́ем се́рдцем и устна́ми. Сподо́би, Премилосе́рдая Ма́ти, ны́не и всегда́ без греха́ сохрани́тися на́м. Поми́луй на́с, Засту́пнице, поми́луй на́с, да бу́дет ми́лость Твоя́ с на́ми, я́ко упова́ем на Тя́, соблюди́ на́с, Премилосе́рдая, во ве́ки веко́в. Тебе́ подоба́ет хвала́, Тебе́ подоба́ет сла́ва, Тебе́ подоба́ет пе́ние ны́не и при́сно, и во ве́ки веко́в, ами́нь.

Перевод:

Тебя, Матерь Бога, хвалим, Тебя, Мария Приснодева и Богородица, исповедуем, Тебя, Превечным Отцом избранную, вся земля величает; Тебе все Ангели и Архангели, Тебе все Начала смиренно служат; Тебе все Власти и превышние Силы небесные, и все Господства повинуются; Тебе все Престолы, Тебе Херувимы и Серафимы радостно предстоят, Тебе все ангельские лики непрестанными голосами вопиют: Пресвятая Богородица Мария, Матерь Приснодева! небо и земля полны величества Твоего чрева; Тебя преславный апостольский хор своего Творца и Спасителя Матерь восхваляет; Тебя Богородицу величают множество мучеников; Тебя преславный исповедников хор называет храмом Святой Троицы; Тебя девственные полки проповедуют образом своего девства; Тебя все души святых называют преславной Царицей Небес; Тебя по всей вселенной, как Матерь Бога, исповедует всех верных христиан святая Церковь и почитает истинного Царя Небесного Богоизбранную Отроковицу; Ты Ангелов Госпожа и слава всех святых; Ты райская открытая дверь; Ты лестница Небесного Царства; Ты Царя славы прекрасный чертог; Ты нетленный ковчег благодати; Ты бездна щедрот; Ты прибежище грешных; Ты, благословенная Мать Спасителя Христа; Ты, ради освобождения пленённого человека, Бога приняла во чрево от Святого Духа и Невместимого вместила; Тобою был попран адский враг и открылись верным двери Царствия Небесного; Ты стоишь по правую сторону Бога; Ты Его умоляешь за нас, Приснодева Мария, поскольку будет судить живых и мертвых; поэтому мы имеем желание, чтобы Ты всегда была нашей Заступницей пред возлюбленным Твоим Сыном и Богом, поскольку Он искупил нас Своей честной кровью, да восприимем вечной славы обещание. Спаси люди Твои, о, Владычица, и благослови достояние Твоё, да будем причастниками блаженного наследия Сына Твоего, и упаси нас, и подыми нас даже до века, на каждый день. О, Прещедрая! Мы имеем желание хвалить и блажить Тебя сердцем и устами. Сподоби, Премилосердая Матерь, сегодня и всегда без греха сохраниться нам. Помилуй нас, Заступница, помилуй нас, да будет милость Твоя с нами, так же уповаем на Тебя, сбереги нас, Премилосердая, во веки веков. Тебе подоба́ет хвала, Тебе подобает слава, Тебе подобает пение ныне и всегда, и во веки веков, ами́нь.

От скверных уст прими моление, о, нескверная, чистая и пречистая Дево Богородице, и не возгнушайся моих словес, о, радосте моя, но призри на мя, помилуй, Мати Зиждителя моего! Во время живота моего не остави мене: веси бо, Владычице, яко на Тя всю мою надежду возлагаю, и все упование мое о Тебе есть. Тем и во время смерти моея предстани ми, Помощнице моя, и не посрами мене тогда. Вем бо, вем, Дево, яко многих грехов повинен есмь, окаянный и трепещу, помышляя час оный: но, Радосте моя, яви ми тогда лице Твое, удиви на мне милость Твою, Ходатаице спасения моего; изми мя, Владычице, от лютости бесовския, и страшнаго и грознаго испытания воздушных духов, и злобы их избави, и всю тогдашнюю скорбь и печаль на радость преложи Твоим просвещением. И сподоби безбедно прейти ми начала и власти тьмы и достигнути поклонитися на престоле славы седящему Христу и Богу нашему со безначальным Его Отцем и Пресвятым Духом, во веки. Аминь.

О, Пресвятая Владычице моя Богородице, Ангелов и Архангелов, Херувимов и Серафимов пречестнейшая, и всех святых пресвятейшая, Дево Мати Божия! Спаси мя, смиреннаго и грешнаго раба Твоего: Ты бо веси, всемилостивая Госпоже, яко всю мою надежду по Бозе на Тя возлагаю, и несть ми иного прибежища спасительнаго, токмо Ты, Всеблагая: Ты моя крепость, Владычице, Ты моя и сила, Ты мое радование в скорбех, Ты мое пристанище во искушениях, Ты мое исправление в падениях. Ты и спасение мое всенадежное, о Мати Зиждителя и Господа моего. Помози ми, плавающему в пучине жития сего, люте обуреваему и бедствующу от потопления греховнаго. Даждь ми руку помощи, помощнице моя, и избави мя от тимения глубины, да не погрязну в бездне отчаяния: буря бо грехов и страстей возста на мя, и волны беззаконий погружают мя. Но Ты, милосердая Мати, в пристанище безстрастия настави и спаси мя, безнадежных надеждо и ходатаице спасения моего. Аминь.

Богородице, Ты еси упование мое, Ты ми еси стена и благонадежное пристанище и спасительное прибежище утомляемому страстей нахождений. Спаси мя от всех враг моих, гонящих душу мою и ловящих ю различными искушений на пути бо сем, По немуже хожду, многия сети сокрыша мя; многия соблазны, многая неудобства, многая прелести, многая немощи душевныя и телесныя уловляют мя в падения греховныя. И уже аз, окаянный, впадох в сети вражия, и связан и держим есмь ими: и что сотворю отчаянный аз, недоумею. Аще бо восхощу покаятися, нечувствием и ожесточением одержим есмь; аще же плакати понуждаются, не имам сокрушения сердечнаго и слез ни поне единыя капли. Увы, окаянства моего! увы, бедности моей! увы, лишения моего! К кому убо прибегну прочее повинный аз Токмо к Тебе, благоутробная Мати Господа и Спаса нашего, ненадежных надеждо, стено и покрове к Тебе притекающих! Не отрини убо мене, блуднаго, не возгнушайся мене, сквернаго: Тебе бо во едину в жизни моей стяжах утеху, Дево Марие Богородице, и к Тебе единей во всякой нужде прибегаю со дерзновением: не остави убо мене в жизни сей и во время смерти моея предстани в помощь, помощнице моя, да узрят Тя вси врази мои и постыдятся, Тобою побежденнии, Владычице, ходатаице спасения моего. Аминь.

Кто Тебе до достоянию ублажити может, Пресвятая Дево, кии уста воспета способны Твое величие, всяк смысл превосходящее? Вся преславная о Тебе содеянная таинства, Богородице, выше смысла и слова суть: красоте девства Твоего и пресветлой чистоте Твоей удивишася Херувимы и ужасошася Серафимы; чудесе бо рождества Твоего нетленнаго ни человеческий, ни ангельский язык изрещи может. От Тебе бо безлетный и единородный Сын Божий, Бог Слово, неизреченно воплощся, родися и с человеки поживе; и Тя, яко Матерь Свою, зело возвеличи, Царицу Тя всея твари показа, нам же известное спасения пристанище. Тем вей под кров Твой притекающий, различными скорбями и болезньми одержимии, приемлют от Тебе богатно утешение и исцеление, и Тобою от бед спасаются: Ты бо еси воистину Мати всех скорбящих и обремененных, печальных радость, больных целительница, юным хранительница, старости жезл, праведных похвала, грешным спасения надежда и к покаянию путеводительница: всем бо всегда предстательством Твоим помогавши и всех заступаеши, Всеблагая, прибегающих к Тебе с верою и любовию. Ты и мне помози, отчаянному деяний моих ради. Заступнице усердная рода христианскаго, заступи мя, да не до конца погибну во гресех, ибо не имам иного прибежища и покрова, разве Тебе, Владычице Мати Живота: не остави убо мене не презри мя, но имиже Сама веси судьбами спаси мя, яко благословенна еси во веки веков. Аминь.

Тебе предаю в защищение живот мой и по Бозе всю надежду спасения моего на Тя возлагаю, Владычице Дево Богородице. Молю Тя, раб Твой, не презри мя многия грехи имущаго, но виждь скорбь мою о сем и недоумение и подаждь ми ослабу и утешение, да не до конца погибну. Простри десницу Твою, Чистая, изми мя от тимения дел моих и постави на чистую пажить заповедей Христа, Царя и Бога моего, да творю я присно, Тобою укрепляем. От грехов моих лютых избави мя, Владычице, и покаяние спасительно мне ниспосли, к Своему Сыну и Богу Матерним ходатайством Твоим. Свет неизреченный возсиявшая, просвети мою тьму душевную, грехов ей прибывшую, Радосте моя, избави мя от обышедших мя невидимых врагов; грехи бо мои мнози и тяжки суть, врази мои люти зело, смерть близь, совесть моя мя обличает, геенна огненная устрашает, червь неусыпаемый, скрежет зубный, тартара тьма кромешняя в трепет мя приводит, ибо ожидают мя прияти, злых дел моих ради Увы мне! что сотворю тогда и к кому прибегну, да спасена будет душа моя! К Тебе единей, сладкая Марие Богородице, услаждающая, на Тя уповающим, горесть смерти, и избавляющая взывающих к Тебе от лютыя геены. Ты и мне помози, Всеблагая, не имущему тогда иныя помощи, токмо Тебе, Всепетая. Спаси мя от ужасов смертнаго часа и лютости тогда бесовския, спаси мя от власти духов злобных на мытарствах воздушных по смерти: яви, молю Тя, яви ми тогда пресветлое лице Твое, Владычице, и не остави мя безпомощнаго. О, милосердная Мати! Преклонися на милость ко мне лишенному милости от дел моих и умоли Его же родила еси плотию Христа, Спасителя и Бога нашего, нас ради на кресте пречистую кровь Свою излиявшаго, да и аз причастник буду заслуг Его крестных пред Отцем Его и их ради получу грехов прощение и вечное спасение и прославлю неизреченное милосердие Твое, Богородице, и Твое милостивое предстательство в безконечныя веки. Аминь.

Радуйся, Дево Богородице, пристанище и предстательство убогия души моея, надеждо сладкая спасения моего! Радуйся, радость от Ангела приемшая в благовещении имеющаго воплотитися от Тебе Бога Слова! Радуйся, всех Зиждителя в Твоих ложеснах носившая! Радуйся, Бога плотию рождшая, миру Спасителя! Радуйся, в рождестве девство нетленно сохранившая! Радуйся, от волхвов дары приемшая и поклонение их от Тебе рождшемуся видевшая, и пастырей преславная о Нем словеса слышавшая и в сердце Твоем слагавшая! Радуйся, отрока Иисуса, Сына Твоего и Бога во храме, среди законоучителей, обретшая радостно! Радуйся, болезни лютыя в страдании крестном, распятии и смерти Сына Твоего и Бога, со ученики Его во славе небесней видевшая! Радуйся, от Него ниспосланнаго Духа Святаго, в горнице Сионстей в виде огненных языков нисшедшаго, со ученики Господни приемшая! Радуйся, на земле ангельски пожившая! Радуйся, чистотою и святынею вся ангельския чины и всех святых лики превосходящая! Радуйся, возвеличенная славою пришествием к Тебе Сына Твоего и Бога! Радуйся, Того святым рукам душу мою радостно предавшая! Радуйся, славно превознесенная Твоим на небеса с телом восшествием! Радуйся, по представлении Твоем боговидцем Апостолом в третий день явльшаяся! Радуйся, на небесех от Отца и Сына и Духа Святаго диадемою вечнаго царствия увенчанная! Радуйся, от всех небесных сил приснопеваемая! Радуйся, близ престола Пресвятыя Троицы на престоле славы возседящая! Радуйся, Бога с человеки примирения виновнице! Радуйся, небесными и земными господствующая Царице! Радуйся, яко ничтоже невозможно есть Твоему ходатайству! Радуйся, яко вси верно к Тебе претекающии спасаются! Радуйся, яко Тобою скорбящии утешение, болящии исцеление, бедствующии благовременну помощь получают! Молю убо Тя, обрадованная Владычице, потреби и во мне печаль греховную и даждь ми радость спасения, даждь ми слезы утешительныя, умиление всегдашнее, покаяние истинное и исправление совершенное. Не возгнушайся мене, Владычице, но приими милостиво сии гласы радостныя, мною убогим Тебе приносимыя, и предстани ми в помощь во время безпомощия моего в час страшный оный, егда разлучитися имать душа моя от окаяннаго моего тела; тогда, молю, предстани ми в помощь и избави мя, повиннаго во гресех, наказания за них вечнаго, да не явлюся радование бесов и пища геенне огненной. Ей, Владычице моя, не попусти узрети души моей страшнаго и грознаго прещения и истязания демонскаго, грешникам уготованнаго, но предвари и спаси мя раба Твоего в час оный ужасный, да славлю Тя во веки, едина надежда моя и Ходатаице спасения моего. Аминь.

О Пресвята́я Де́во, Ма́ти Го́спода, Цари́це Небесе́ и земли́! Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас, с ве́рою и любо́вию покланя́ющихся пречи́стому о́бразу Твоему́. Се бо грехми́ погружа́емии и скорбьми́ обурева́емии, взира́юще на Твой о́браз, я́ко живе́й Ти́ су́щей с на́ми, прино́сим смире́нная моле́ния на́ша. Не и́мамы бо ни ины́я по́мощи, ни ино́го предста́тельства, ни утеше́ния, то́кмо Тебе́, о Ма́ти всех скорбя́щих и обремене́нных! Помози́ нам, немощны́м, утоли́ скорбь на́шу, наста́ви на путь пра́вый нас, заблужда́ющих, уврачу́й боле́зненная сердца́ на́ша и спаси́ безнаде́жных, да́руй нам про́чее вре́мя живота́ на́шего в ми́ре и тишине́ проводи́ти, пода́ждь христиа́нскую кончи́ну и на Стра́шнем Суде́ Сы́на Твоего́ яви́ся нам милосе́рдая Предста́тельница, да всегда́ пое́м, велича́ем и сла́вим Тя я́ко благу́ю Засту́пницу ро́да христиа́нскаго, со все́ми угоди́вшими Бо́гу. Ами́нь.

О Пресвята́я Госпоже́ Влады́чице Богоро́дице! Со стра́хом, ве́рою и любо́вию пред честно́ю (и чудотво́рною) ико́ною Твое́ю припа́дающе, мо́лим Тя: не отврати́ лица́ Твоего́ от прибега́ющих к Тебе́. Умоли́, милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь же Свою́ Святу́ю непоколеби́му да соблюде́т и от неве́рия, ересе́й и раско́ла да изба́вит. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты еси́ всеси́льная христиа́н Помо́щница и Засту́пница. Изба́ви же и всех, с ве́рою Тебе́ моля́щихся, от паде́ний грехо́вных, от наве́та злых челове́к, от вся́ких искуше́ний, скорбе́й, боле́зней, бед и от внеза́пныя сме́рти. Да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси, благода́рне воспева́юще вели́чия и ми́лости Твоя́, явля́емыя над на́ми зде на земли́, сподо́бимся и Небе́снаго Ца́рствия, и та́мо со все́ми святы́ми просла́вим пречестно́е и великоле́пое и́мя Отца́, и Сы́на, и Свята́го Ду́ха во ве́ки веко́в. Ами́нь.

О Пресвята́я Влады́чице и Богоро́дице, вы́сшая Херуви́м и честне́йшая Серафи́м, Богоизбра́нная Отрокови́це, всех скорбя́щих Ра́досте! Пода́ждь утеше́ние и нам, в ско́рби су́щим: ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея Хода́таица, и я́ко Ма́ти Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́: никто́же бо притека́яй к Тебе́ просра́млен отхо́дит. Услы́ши у́бо и нас, ны́не в день ско́рби пред Твое́ю ико́ною припа́дающих и со слеза́ми Тебе́ моля́щихся: отжени́ от нас належа́щия на нас ско́рби и печа́ли в сей вре́менней жи́зни, не лише́ны же сотвори́ ны Твои́м всеси́льным хода́тайством и ве́чныя несконча́емыя ра́дости во Ца́рствии Сы́на Твоего́ и Бо́га на́шего, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и со Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

О ми́ра Засту́пнице, Ма́ти Всепе́тая! Со стра́хом, ве́рою и любо́вию припа́дающе пред честно́ю ико́ною Твое́ю Держа́вною, усе́рдно мо́лим Тя: не отврати́ лица́ Твоего́ от прибега́ющих к Тебе́. Умоли́, милосе́рдая Ма́ти Све́та, Сы́на Твоего́ и Бо́га на́шего, сладча́йшаго Го́спода Иису́са Христа́: да сохрани́т в ми́ре страну́ на́шу, да утверди́т держа́ву на́шу во благоде́нствии и изба́вит нас от междоусо́бныя бра́ни; да укрепи́т Святу́ю Це́рковь на́шу Правосла́вную и незы́блему соблюде́т ю от неве́рия, раско́ла и ересе́й. Не и́мамы бо ины́я по́мощи, ра́зве Тебе́, Пречи́стая Де́во: Ты еси́ всеси́льная христиа́н Засту́пница пред Бо́гом, пра́ведный гнев Его́ умягча́ющая. Изба́ви всех, с ве́рою Тебе́ моля́щихся, от паде́ний грехо́вных, от наве́та злых челове́к, от гла́да, скорбе́й и боле́зней. Да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние согреше́ний на́ших, да вси, благода́рне воспева́юще вели́чия Твоя́, сподо́бимся Небе́снаго Ца́рствия, и та́мо со все́ми святы́ми просла́вим пречестно́е и великоле́пое и́мя в Тро́ице сла́вимаго Бо́га, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.

О Премилосе́рдная Влады́чице! К Твоему́ заступле́нию ны́не прибега́ем, моле́ний на́ших не пре́зри, но ми́лостиво услы́ши нас: жен, дете́й, ма́терей и тя́жким неду́гом пиа́нства одержи́мых, и того́ ра́ди от ма́тере своея́, Це́ркве Христо́вой, и спасе́ния отпа́дающих, бра́тий и сесте́р и сро́дник на́ших исцели́. О Ми́лостивая Ма́ти Бо́жия, косни́сь серде́ц их и ско́ро возста́ви от паде́ний грехо́вных, ко спаси́тельному воздержа́нию приведи́ их. Умоли́ Сы́на Своего́, Христа́ Бо́га на́шего, да прости́т нам согреше́ния на́ша и не отврати́т ми́лости Своея́ от люде́й Свои́х, но да укрепи́т нас в трезве́нии и целому́дрии. Приими́, Пресвята́я Богоро́дице, моли́твы ма́терей, о ча́дех свои́х сле́зы пролива́ющих, жен, о му́жех свои́х рыда́ющих, чад си́рых и убо́гих, заблу́ждшими оста́вленных, и всех нас, к ико́не Твое́й припа́дающих. И да прии́дет сей вопль наш, моли́твами Твои́ми, ко Престо́лу Всевы́шняго. Покры́й и соблюди́ нас от лука́ваго ловле́ния и всех ко́зней вра́жиих, в стра́шный же час исхо́да на́шего помози́ пройти́ непреткнове́нно возду́шная мыта́рства, моли́твами Твои́ми изба́ви нас ве́чнаго осужде́ния, да покры́ет нас ми́лость Бо́жия в несконча́емыя ве́ки веко́в. Ами́нь.

О Всеми́лостивая Госпоже́ Богоро́дице, Небе́сная Цари́це, всемо́щная Засту́пнице, непосты́дное на́ше упова́ние! Благодари́м Тя о всех благодея́ниих, росси́йским лю́дем от Тебе́ бы́вших, отдре́вле и додне́сь от чудотво́рныя ико́ны Твоея́ явле́нных. И ны́не, Преблага́я Влады́чице, при́зри на ны, гре́шныя и недосто́йныя рабы́ Твоя́, яви́ нам ми́лость Твою́ и моли́ Сы́на Твоего́, Христа́ Бо́га на́шего, о е́же изба́витися нам от вся́каго зла и сохрани́тися ца́рствующим градо́м, вся́кому гра́ду и ве́си, и всей стране́ на́шей, от гла́да, губи́тельства, тру́са, пото́па, огня́, меча́, наше́ствия иноплеме́нник и междоусо́бныя бра́ни. Сохрани́ и умудри́ па́стырей Це́ркве, е́же досто́йно пасти́ ста́до Христо́во и пра́во пра́вити сло́во и́стины; укрепи́ христолюби́вое всеросси́йское во́инство, пода́ждь дух сове́та и ра́зума военача́льником, градонача́льником и всем, Иже во вла́сти суть; низпосли́ свято́е Твое́ благослове́ние и всем правосла́вным христиа́ном, покланя́ющимся Ти и моля́щимся пред цельбоно́сною Твое́ю ико́ною. Бу́ди нам Засту́пница и Хода́таица пред Престо́лом Всевы́шняго, иде́же предстои́ши. К кому́ у́бо прибе́гнем, а́ще не к Тебе́, Влады́чице? Кому́ принесе́м сле́зы и воздыха́ния, а́ще не Тебе́, Пресвята́я Богоро́дице? Не и́мамы бо ины́я по́мощи, не и́мамы ины́я наде́жды, ра́зве Тебе́, Небе́сная Цари́це. Под Твой покро́в притека́ем: моли́твами Твои́ми низпосли́ нам мир, здра́вие, земли́ плодоно́сие, возду́ха благорастворе́ние, изба́ви ны от вся́ких бед и скорбе́й, от вся́ких неду́гов и боле́зней, от внеза́пныя сме́рти и от всех озлобле́ний враго́в ви́димых и неви́димых. Вразуми́ и научи́ ны, о Всеми́лостивая Засту́пнице, путь земна́го сего́ жития́ безгре́шно прейти́. Ты ве́си не́мощи на́ша, ве́си и согреше́ния на́ша, но и ве́ру ве́си, и упова́ние ви́диши: те́мже да́руй нам исправле́ние грехо́вныя жи́зни и умягчи́ зла́я сердца́ на́ша. Укрепи́ в нас пра́вую ве́ру, вложи́ в сердца́ на́ша дух стра́ха Бо́жия, дух благоче́стия, дух смире́ния, терпе́ния и любве́, в до́брых де́лех преуспе́яние: изба́ви же нас от искуше́ний, от па́губных душевре́дных уче́ний, от неве́рия, развраще́ния и поги́бели ве́чныя. Тебе́ у́бо про́сим, Пречи́стая Влады́чице, и припа́дающе пред свято́ю Твое́ю ико́ною, мо́лимся: умилосе́рдися на ны и поми́луй ны, в Стра́шный же день Суда́ хода́тайством и заступле́нием Твои́м сподо́би ны ста́ти одесну́ю Сы́на Твоего́, Христа́ Бо́га на́шего, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и Пресвяты́м и Благи́м и Единосу́щным Его́ Ду́хом, ны́не и при́сно, и во ве́ки веко́в. Ами́нь.

Благодарим Тя, о Преблагая и Пречистая, Преблагословенная Дево, Владычице, Мати Христа Бога нашего, о всех благодеяниих Твоих, яже показала еси роду человеческому, наипаче же нам, христоименитым людем российским, о нихже ниже самый ангельский язык к похвалению доволен будет. Благодарим Тя, якоже и ныне удивила еси неизреченную Твою милость на нас, недостойных рабех Твоих, преестественным самопришествием Пречистыя Твоея иконы, ею же всю просветила еси Российскую страну. Темже и мы, грешнии, со страхом и радостию покланяющеся, вопием Ти: о Пресвятая Дево, Царице и Богородице, спаси и помилуй люди Твоя, и подаждь им победы на вся враги их, и сохрани царствующия грады, и вся грады и страны христианския, и сей святый храм от всякаго навета вражия избави, и всем вся на пользу даруй, ныне пришедшим с верою и молящимся рабом Твоим, и поклоняющимся Пресвятому образу Твоему, яко благословенна еси с рождшимся от Тебе Сыном и Богом, ныне и присно и во веки веков. Аминь.

О пречу́дная и превы́шшая всех тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти, Пресвята́я Одиги́трие Мари́е!

Услы́ши ны, гре́шныя и недосто́йныя, в час сей моля́щияся и к Тебе́ со воздыха́нием и слеза́ми пред Пречи́стым о́бразом Твои́м припа́дающия, и си́це уми́льно глаго́лющия: изведи́ нас от ро́ва страсте́й, Одиги́трие Блага́я, изба́ви нас от вся́кия ско́рби и печа́ли, огради́ от вся́кия напа́сти и злых клеве́т и от непра́веднаго наве́та вра́жия.

Мо́жеши бо, о Благода́тная Ма́ти на́ша, не то́чию от вся́каго зла сохрани́ти лю́ди Твоя́, но и вся́ким благодея́нием снабди́ти и спасти́: ра́зве бо Тебе́ ины́я предста́тельницы в беда́х и обстоя́ниях и те́плыя хода́таицы о нас гре́шных к Сы́ну Твоему́, Христу́ Бо́гу на́шему, не и́мамы. Его́же умоли́, Влады́чице, спасти́ нас и Ца́рствия Небе́снаго сподо́бити, да спасе́ннии Тобо́ю сла́вим Тя и в бу́дущем ве́це, я́коже спасе́ния на́шего Вино́вницу, и превозно́сим всесвято́е и великоле́пое и́мя Отца́, и Сы́на, и Свята́го Ду́ха, в Тро́ице сла́вимаго и покланя́емаго Бо́га, во ве́ки веко́в. Ами́нь.